Gen 43 | BJR | STEP | Kannaana máqa máaqaki aandaróo firaafá nárinoo mandáika uqanná inau.

Genesis 43

Yóoseefaana áfasausamara Beensaminna uru áfiqee kaifáa Isipa máqa máaqai óoqu fú ufafa.

1 Kannaana máqa máaqaki aandaróo firaafá nárinoo mandáika uqanná inau. 2 Isipa máqa máaqai feefaurúmmamaree múrusoo náranna Yakooboona áiku ásauku náma taikásoofanóo Yakooboofa narí faiqi námu qímanniminau. Kaifáa óoquree káqikaa nárana feefaurúmma múrusaifaqa náà.

3 Míqi qímasoofanóo Yúdafa qinau. Mindáraa úriqararafa maasá óori runúsee qímaqimifaqa íriqa. Ínnee ínneeqa níkaqa sía áfiqee qúmiqa sía qiní qífusaa nifáranoo fée qínoo. 4 Anée qiní qíkaqara eedóo qínaqa maasá áfiqee óoquree aní nárana feefauríanaura. 5 Anée sía eedóo qínanoo maasá qíkaqa sía óoqu fínaqa sía amana fífau óoqu fúanaura. Mi maqannáasa úriqararafa qinoo ínni níkaqa sía qúminaqa sía qiní qífusaa nifáranoo fee qínoo. 6 Yakooboofa mi ufána iriséenoo qinau. Ínnee nánaree moómoo úmmaara qiní qímidee mi uriqararána qímamíqa maasá qíkaqa máridanoo fee qífee.

7 Misa iriséeqa kafáa qímamiqa qiqau. Mi uriqararáfa maasára fáqa maasá faiqì ánaaseera fáqa ireenoo. Ínni níkoofa káqi fée máridanoo fee qinoo. Kafaa ínni níkaqa moó máridanoo fée qinoo. Miqí qímasee maasá iraifaqa qímamiqa. Maasá náqaa fée másee maasá qíkaqa áfiqee qúmuaqee qianínnanara írianauree. Sía maasa íriqa.

8 Miqí qímasee Yúdafa narí ákoona maaqí qímasee qímaminau. Qípoo anée maasá qíkaqa qiní qísaukuki quqásáinaqa maasá doo fíndifi óoqu fúanauranoo. Miqínaqa maasá sía dáara ráinaqa kúqunauranoo. 9 Qinée qeeqá márirana miná ámaaqa máqaanaura. Anee minára qiní kíkiaqa úsua. Qinee sía áfiqee andeeqásee anée íannannai úriqa qinee aní nífairirana máraanaura. 10 Maasá sía aní faqa kísaaqasaa ufa qífau, maasá amana qaara kari óoquree ururée únaiqini.

11 Miqí qufanóo misá níkoofa qímanniminau. Doo amaná ínneeqa miqíqa miqíaqa. Ínnee maa maqa maaqána kínaana ámiqira áinaina ínneeqa uqaki rúmammareéqa kaqí ními maría ainainnára foorá múqu mi maqannáasa úriqararana ámiaqa. Saqári anoona qóodaa faqa ookasaasá anoona qóodaa faqa adíafaa ímari saqari qaqamána anoona faqa oofauna fooqáa íra áinaina anoona faqa kasá fooqáana anoona faqa máree ooqu fúaqa. 12 Ínnee moómoo munnimma qaara kari afaqámaree óoqu fúaqa. Ínnee óoqai munnimma ínni uqa adíanai márufaqa qáfaqau. Abee, áaqamasee munnimma ínni uqáki kafáa quqaqau. 13 Ínneeqa níkaqa áfiqee óoqurandee kai káqi úruaqa. 14 Aiqáma afeeka faqáa Ánutufa dadaaqínanoo mi fasiqáfa ínniara qimudáòo qíani. Qimudáòo qímaseenoo Beensaminna faqa ínni nikaqa moó faqa kafáa nímiani. Qinee qiní faiqi námu kakasífanoo doo sáina kakasíani.

15 Miqí qímasoofaqa Yakooboona faiqi námu mi saqari anoonáusa faqa munnimma moómoo qaara karí mára máree Isipa máqa máaqai Beensaminna fáqa áfiqeeqa óoqu fiqau. Miqoo misá Yóoseefaafa máruqoo óoqu kikíqa mambufanoo Yóoseefaafa misá níndafanau. 16 Yooseefaafa Beensaminna qáfamaseenoo narí máaqakinaa aináinasaa rakísi marú fasiqána qímaminoo qinau. Anee maa fasiqáusa nífiqéenana qiní máaqaki múnu quqáa. Misá súani qámbaana qiní faqa nárana neefáranoo. Anee aandáù aruséenana deedaqía.

17 Aináinira fáiqi fánnoo mifá qímamundee ínoo misáuqa nífiqee Yóoseefaana máaqaki múnu quqánau. 18 Yóoseefaana máaqai nifiqee múnu quqárara fímarufaqa misá rufíaidaqa óonumafi írimariqau. Indaarú nárana feefauríafanna múnnimmana maasá mara máreeqa qímaaqai múrusee mi munnimmána maasá uqáki paqúriafannana ákiiqara maasá maí qifiqee ánidanoo. Misá kái káqi maasá darusée maasá doonkíuqa marasáifaqa maasá misá aináinira fáiqikianaura.

19 Misa miqí qímiriseeqa miná ainainásaa rakísi marú faiqína máaqa kooqíki óonuree qímamiqau. 20 Óo úriqarara amanée maasa ufa írinnaree. Óoqai maasa qeeqá máaqaindari maí qumurée nárana feefauru iqíafana. 21 Maasá maí feefaurú mámaree óoru fíiufaqá aanái óoru faiqárara úiqaana arasée maasá qeeqá sakuma úqa sánda idukúsee qáfaafánanoo maasá aiqámausa áquafanna munnimmafa aiqáma maasa uqáuqa adíanai márinau. 22 Maasá mi munnimmána fábaqa maasá qeeqáindi moó fáqa fíqaramasee nárana feefaurírara máree qúmidaqa. Yáfee moó fánnoo maasá uqákiaqa maasá nárana feefauríafánna múnnimmana kafáa uqárinau fee.

23 Miqí qímasoofanoo Yóoseefaana aináinasaa rakisi máru faiqífa iriséenoo qinau. Doo ínnee nifaaqa quqáaqa. Sía rufía rufía iaqa. Ínni Ánutufa ínni níkoona Ánutufa mifá kai ínni munnimma ínni uqáki rinau. Doo qinee ínni munnimma máreeqa. Mifá miqí qímaseenoo Simeeoonna karabúsaki máruna idukú éeqeenoo misáki quqánau.

24 Quqáseenoo misá nífiqa máreenoo Yóoseefaana máaqaki múnu quqáseenoo nammári nímufaqa níku nammári uqusée máriqau. Misá doonkíuqa faqa nárana nímufaqa naqau. 25 Miqímmasee misá nári máree qúmu ainaináusa Yóoseefaafa suani qámbaana aniráinaqa ámiraree qímasee deedaqiqau. Yóoseefaafa súani qámbaana ínni faqa nárana naanáuranoo fee qímasee qímannimunara irisée deedaqiqau. 26 Yóoseefaafa máaqai aniroofaqá misa nárì máaqaindari máree qúmu ainaináusa mara máree máaqaki mifá márunnai óoruree mina óorinni nóorindari maqásaa áqufiqau. 27 Miqímmásoofanoo Yóoseefaafa misára ámiqi fée másee máridee qímasee irámirínau. Ínneeqa níkoona náuraiqiara qíma qímufaqa íriafanafa maqee káqi fée máridanoo fée.

28 Qufaqá misá iriséeqa qiqau. Eeóò aní uréeqara áinainira fáiqi maasá qíkoofa káqi máridanoo. Miqí qímaseeqa misá kafáa Yóoseefaana óorínni nóorindari maqásaa áqufiqau.

29 Miqímmasoofanoo Yóoseefaafa narí ákaqa Beensaminná qáfamaseenoo qinau. Maaná ínneeqa níkaqara qíma qímufaqa íriafanafee. Qímaseenoo Yóoseefaafa qinau. Qiní qímaaku Ánutufa aní ámiqi ámiqimma ámaqaani. 30 Miqí qímaseenoo kái káqi fíndifufanoo quqásee finau. Miná ámuqusa firaaqóo narí ákaqara mandáikufanoo finau. Yóoseefaafa misá nífusaa ikí ráqaaqaa ufanoo quqásee narí faiqée máru rúmmanai óonuree ikí ráqanau.

31 Ikí ráqeeseenoo nammárinnnai aukunu nammári uquséenoo narí aukunu afeekaiká mándeenoo dóo misúnnai qumuréenoo narí suqée marúna qímaminau. Dóo nárana rakíqaannee qinau.

32 Miqí qufanóo suqée marúfa nárana náadu náadu rakíqanau. Yóoseefaana áaduma téeboorasáa rakíqa ámaqanau. Kafaa miná áfasausa mara náaduma téeboorasáa rakiqa nímaqanau. Isipa máqannaasa minaki née márusa náaduma moo téeboorasáa rakíqa nímaqanau. Isipa máqannaasa Qeeburu máqannaasa fáqa nárana nárara níkooqee márusa márunara náadu náadu naqau. 33 Yóoseefaafa narí nárana suqée marú faiqína qumeé kaí qímamufanoo mi faiqífa misá nífasaana indaarú mara óoqu mara ámaqaseenoo miná ánaaqiannaana miná múqufi óoqu mara ámaqasee miqímmámaree ínaaqíana níkaqa fannoo átinni óoqu márinau. Misá nárì óoqufaaqéeuna qáfamasee tautúmasee narí qáfee narí qáfee iqau. 34 Yóoseefaafa narí qufanóo miná difáanikinaa nárana maréeqaida misá pirítakiaqa quqá máreenoo Beensaminnaíndiki fíqaramásee moodáannai qísauku 5 kari nárana quqánau. Quqásoofaqa nárana faqa úainna námmari faqa néeneesoofanóo doo nifaaqa idukú fufaqa qufaina qíqa asasiqau.